Lankamuslim.org

கலாநிதி மஸிஹுதீன் இனாமுல்லாஹ்
ரஊப் ஹகீம் தலைமையிலான முஸ்லிம் காங்கிரஸ், அதாவுல்லாஹ் தலைமையிலான தேசிய காங்கிரஸ், ரிஷாத் பதி தலைமையிலான மக்கள் காங்கிரஸ் மூன்று அணியினரும் ஸ்ரீ லங்கா முஸ்லிம் காங்கிரஸ் எனும் மாபெரும் விருட்சத்தின் கிளைகளாகவே கருதப் பாடல் வேண்டும், கடந்த கால கசப்புணர்வுகளை தொடர்ந்தும் கௌரவப் பிரச்சினைகளாக முன்னெடுத்துச் செல்லாது காலத்தின் தேவை கருதி தேசிய அரசியலில் தனித்தும் சேர்ந்தும் காய் நகர்த்துகின்ற ஒரு ஒழுங்குக்கு வருவது அவசரத் தேவையாக உள்ளது.

வடக்கில் ரிஷாத் பதி அணியினரும், அம்பாறையில் குறிப்பாக அக்கரைப் பற்றில் அதாவுல்லாஹ் அணியினரும் செல்வாக்குச் செலுத்துவதில் விட்டுக் கொடுப்புகளை முஸ்லிம் காங்கிரஸ் தலைமை செய்ய முன்வர வேண்டும்.! வட கிழக்கிலங்கை உலமாக்கள் , பள்ளி வாசல் சம்மேளனங்கள் எதிர் வரும் மாகான சபைத் தேர்தல்களை கவனத்திற் கொண்டு இவர்கள் மீது ஒரு அழுத்தத்தை பிரயோகிக்க வேண்டும்.!

கிழக்கில் முஸ்லிம் முதலமைச்சர் ஒருவர் வரும் வாய்ப்புக்கள் அதிகம் இருப்பதால் இருபது வருசத்திற்கு முன்னரான இலட்சியக் காங்கிரஸாக இவர்கள் ஒன்றிணைந்து களமிறங்குவது குறித்து கூடிப் பேசுதல் சிறந்ததாகும். தேசிய அரசியலைப் பொறுத்த வரையும், பிராந்திய சர்வதேச விவகாரங்களைப் பொறுத்த வரைக்கும் தமிழ் மக்களது அபிலாஷைகளுக்கு மதிப்பு அளிக்கின்ற ஒரு வேலைத் திட்டத்துடன் இவர்கள் ஒரு கூட்டு முன்னணியாக களமிறங்கி தங்களது அரசியல் பேரம் பேசும் வலிமையை மீட்டு எடுத்துக் கொண்டு அரசியல் தீர்வுத் திட்டம் ஒன்றை நோக்கிய பயணத்தில் அடுத்த சமூகங்களுக்கு நிகராக நின்று நிரந்தர சமாதான சக வாழ்விற்கான அசைக்க முடியாத அடித்தள மொன்றை கிழக்கில் இட்டுக் கொள்ள வேண்டும்.

கிழக்கு மாகாண சபைக்கான தேர்தலில் பலமான முதன்மை வேட்பாளராக ரவூப் ஹகீம் களமிறங்க வேண்டிய நிலை முஸ்லிம் காங்கிரஸைப் பொறுத்த வரை ஏற்பட்டிருப்பதாகவே ஊகிக்க முடிகிறது, அவ்வாறு ரவூப் ஹகீம் களமிறங்கு வதாயின் முறையே ரிஷாத் தரப்பிற்கு ஒரு அமைச்சர் பதவியும் அதாவுல்லாஹ் தரப்பிற்கு ஒரு அமைச்சர் பதவியும் வழங்க முடியும்.!

சிங்கள தமிழ் சமூகங்களுடன் பேரம் பேசி விட்டுக் கொடுப்புகளை செய்யவும் அதேபோல் வேண்டி நிற்கவும் தயாராயுள்ள நாம் ஏன் தனிப்பட்ட முறையில் நண்பர்களாயிருந்தும் நமக்குள் கௌரவப் பிரச்சினைகளுடன் கூடிய பலப் பரீட்சிகளை முன்னெடுக்க வேண்டும், ரவூப் ஹகீமை பொறுத்தவரை மத்திய அரசின் அமைச்சுப் பதவியினை துறந்து முதலமைச்சர் வேட்பாளாராக நிற்பதற்குரிய தீர்மானத்தை எடுப்பதும் மிகவும் கடினமான ஒரு விடயமாகும்.

ரவூப் ஹகீம் முதன்மை வேட்பாளாராக களமிறங்கா விடின் அந்த கூட்டணியில் எவர் முதலமைச்சர் வேட்பாளராக வர வேண்டும் என்பது குறித்தும் பல விட்டுக் கொடுப்புகளுடன் நாம் பேசித் தீர்த்துக் கொள்ள வேண்டும்! அதேபோல் எதிர்கால பாராளு மன்றத் தேர்தல் களையும் கவனத்தில் எடுத்து நாம் பேச்சு வார்த்தைகளை மேற்கொள்ளின் இயன்ற வரை சகல தரப்புக் களினதும் அபிலாஷைகளை உள்வாங்கிய சில தெளிவான உடன் பாடுகளுக்கும் ஒருங்கிணைந்த வேலைத் திட்ட மொன்றிற்கும் எம்மால் வர முடியும்.

பிரிந்து நின்று சில்லறை வியாபாரமாக எமது அரசியலை தொடர்ந்தும் கையாளாது ஒற்றுமைப்பட்டு ஒட்டு மொத்த சமூக நன்மைகளையும் நலன்களையும் முதன்மைப் படுத்திய ஒரு முஸ்லிம் தேசிய அரசியல் வேலைத்திட்டம் ஒன்றை நோக்கி நாம் நகர வேண்டும்! தேசிய பிராந்திய சர்வதேசிய இராஜதந்திர நகர்வுகளில் நாம் தொடர்ந்தும் பார்வையாளர்களாக இருக்க முடியாது!

முஸ்லிம் சமூகம் இன்று பல்வேறு பேரின சக்திகளால் இலக்கு வைக்கப் பட்டுக் கொண்டிருக்கின்றது, இஸ்லாத்தையும் முஸ்லிம்களையும் இலக்கு வைக்கின்ற சர்வதேச மற்றும் பிராந்திய உளவு ஸ்தாபனங்களின் கவனமும் இலங்கை முஸ்லிம்களை குறி வைத்துள்ளமை அண்மைக்காலமாக வெகுவாக உணரப்பட்டு வருகிறது, இந்த நிலைமையில் முஸ்லிம் உம்மத்திற்கான அமானிதமான அரசியல் குழுக்களுக்கிடையிலான குறுகிய அரசியல் போட்டா போட்டியாக சூதாட்டமாக மாறுவதனை சகலவிதமான முற்போக்கு சக்திகளும், வளர்ந்து வரும் புதிய தலைமுறையினரும் ஒரு போதும் அங்கீகரிக்க மாட்டார்கள்.

மேற்படி தரப்புக்கள் உடன் படுகின்ற பொழுது அவ்வாறான ஒரு பேச்சு வார்த்தைக்கான பூர்வாங்க ஏற்பாடுகளை என்னால் செய்ய முடியும் என்பதனையும் சகல தரப்புக்களுக்கும் தெரிவித்துக் கொள்ள விரும்புகிறேன்!

அஷ் ஷேய்க் கலாநிதி மஸிஹுதீன் இனாமுல்லாஹ் நளீமி